शनिबार, जेठ ७, २०७९
नेकपा एमालेका उपाध्यक्ष तथा पूर्व अर्थमन्त्री विष्णु पौडेलको गृहनगर तथा निर्वाचन क्षेत्र रहेको बुटवल उपमहानगरमा एमालेलाई हराउँदै नेपाली कांग्रेसले जित हाँसिल गरेको छ । योसँगै बुटवलमा नेकपा एमालेको २५ वर्षको बिरासत ढलेको छ ।
नेकपा एमालेले पटक पटक जित्दै आएको रुपन्देहीको बुटवल क्षेत्रमा यो पटक भने नेपाली कांग्रेसका बुटवलका मेयरका उम्मेदवार खेलराज पाण्डेले ७५३३ मतान्तर सहित विजयी भएका छन् । पाण्डे विजयी भएसँगै बुटवलको नेतृत्वको अब कांग्रेसको हातमा गएको छ । प्रजातन्त्र आएपछि एक कार्यकाल स्थानीय तहमा नेतृत्व गरेको कांग्रेसले २५ वर्षपछि बुटवल क्षेत्रको नेतृत्व गर्ने भएको हो ।
बुटवलमा खसेको कुल ६३ हजार १ सय १६ मतमध्ये खेलराजको भागमा ३० हजार १ सय ३० मत आएको छ । जुन कुल मतको ४७.७३ प्रतिशत हो । नेकपा एमालेका उम्मेदवार बाबुराम भट्टराईले २२ हजार ५ सय ९७ मत पाएका छन् । उनलाई एमालेकै उपमेयर उम्मेदवार भन्दा पनि कम मत आएको छ । यस्तै राप्रपाका उम्मेदवार मृगेन्द्र शेरचनले ४ हजार २ सय ९७ मत पाएका छन् ।
यता उपमेयरमा भने नेकपा एमालेकी साबित्रादेवी अर्याल विजयी भएकी छन् । उनी २४ हजार ९ सय ४ मत ल्याउँदै बिजयी भएकी हुन् । गठबन्धनमा नेकपा एकीकृत समाजबादीबाट चिन बहादुर गुरुङले १६ हजार ९ सय ८० मत ल्याएका छन् भने राप्रपाकी भगवती पाण्डेले ६ हजार ५ सय २९मत ल्याएकी छन् ।
२०७४ सालको पहिलो स्थानीय तहको निर्वाचनमा कांग्रेस–माओवादी गठबन्धनका उम्मेदवारहरूलाई पराजित गरी एमालेबाट मेयरमा शिवराज सुवेदी र उपमेयरमा गुमादेवी आचार्य निर्वाचित भएका थिए ।
उपमहानगरका १९ वडामध्ये नेपाली कांग्रेसले ११ वडाहरू जितेको छ । नेकपा एमालेले ५, माओवादी केन्द्रले १, एकीकृत समाजवादीले १ र एक वडा स्वतन्त्र उम्मेदवारले जितेका छन् ।
मेयर सुवेदीले गएको निर्वाचनमा २३ हजार २४९ मत प्राप्त गरी निकटतम प्रतिद्वन्द्व कांग्रेसका खेलराज पाण्डेलाई पराजित गरेका थिए । पाण्डेको मत २० हजार ८५१ थियो । मेयरमा २ हजार ३९८ मतको अन्तर थियो ।
यस्तो छ बुटवलमा राजनीतिक बिगत
बुटवल देशकै पुरानो नगरपालिका मध्येको हो । बुटवल विक्रम संवत् २०१६ सालमा नगरपालिका बनेको थियो । बुटवलमा प्रजातन्त्र आएपछिको २०४९ सालको स्थानीय तहको निर्वाचनमा नेपाली कांग्रेसका सूर्य प्रसाद प्रधानले मेयर जितेका थिए । २०५१ एमालेका मोदनाथ प्रश्रित सांसद हुँदै शिक्षामन्त्रीसम्म बने । ०५६ सालमा संसदको निर्वाचनमा सूर्य प्रधानले जिते । उनले विष्णु पौडेललाई पराजित गरेका थिए ।
०५४ को तत्कालीन स्थानीय चुनावमा पनि बुटवलमा एमालको तर्फबाट मेयरमा भोजप्रसाद श्रेष्ठ र उपमेयरमा विमलबहादुर शाक्य निर्वाचित भएका थिए ।
बुटवलबाट एमाले उपाध्यक्ष पौडेलले २०६४, २०७० र २०७४ को निर्वाचन लगातार भारी मतका साथ निर्वाचित भएर ‘हयाट्रिक’ गरेका छन् । पौडेलले ०६४ सालमा सूर्य प्रसाद प्रधान र ०७० को दोस्रो संविधानसभा निर्वाचनमा तत्कालीन माओवादीका नेता तथा हाल जसपा नेता डा. बाबुराम भट्टराई र सूर्य प्रसाद प्रधानलाई भारी मतका साथ बुटवलबाट पराजित गरेका थिए । ०७४ मा भने कांग्रेसका युवराज गिरीलाई पौडेलले पराजित गरेका थिए ।
news source: shilapatra
