बुद्धजयन्तीको अवसरमा भारतीय प्रधानमन्त्री नरेन्द्र मोदीको नेपाल भ्रमण हुने

उच्चस्तरीय भेटवार्तादेखि सबै कार्यक्रम लुम्बिनीमै 

भारतीय प्रधानमन्त्री नरेन्द्र मोदीलाई लुम्बिनी बौद्ध विश्वविद्यालयले मानार्थ महाविद्यावारिधिबाट सुशोभित गर्ने

भारतीय प्रधानमन्त्री नरेन्द्र मोदीले चार वर्षपछि नेपालको औपचारिक भ्रमण गर्ने तय भएको छ । मोदी बुद्धजयन्तीका दिन २ जेठमा एकदिने औपचारिक भ्रमणका क्रममा लुम्बिनी आउँदै छन् । आफ्नो भारत भ्रमणका क्रममा प्रधानमन्त्री शेरबहादुर देउवाले समकक्षी मोदीलाई नेपाल भ्रमणको निम्तो दिएका थिए । ०७१ मा प्रधानमन्त्री भएपछि मोदीको यो पाँचौँ भ्रमण हो भने दोस्रोपटक प्रधानमन्त्री भएपछि उनको यो पहिलो नेपाल भ्रमण हो । 

परराष्ट्र मन्त्रालय स्रोतका अनुसार नेपाल र भारतले मंगलबार मोदीको नेपाल भ्रमणको विस्तृत कार्यतालिका औपचारिक रूपमा सार्वजनिक गर्दै छन् । ‘प्रधानमन्त्रीको निमन्त्रणाका आधारमा भारतीय प्रधानमन्त्री मोदी बुद्धजयन्तीका अवसरमा लुम्बिनी आउन लाग्नुभएको हो, दुई देशबीच उच्चस्तरीय वार्तादेखि सबै कार्यक्रम लुम्बिनीमै हुने गरी कार्यक्रम तयार भएको छ,’ परराष्ट्रसम्बद्ध एक अधिकारीले भने । 

मोदी सीमावर्ती भारतीय सहरबाट लुम्बिनी आउनेछन् । मोदीले गौतम बुद्धको जन्मस्थल लुम्बिनी क्षेत्रमा ६ घन्टा बिताउनेछन् । त्यहीँ प्रधानमन्त्री देउवा र मोदीबीच औपचारिक वार्ता हुनेछ । देउवाको पछिल्लो भारत भ्रमणपछि दुई देशबीचको सम्बन्धबारे उनीहरूबीच छलफल हुनेछ । ‘मोदी कम्तीमा आधा दर्जनजति कार्यक्रममा सहभागी हुनेछन्,’ परराष्ट्र स्रोतले भन्यो । मोदी लुम्बिनीबाटै भारत फर्किनेछन् । 

प्रधानमन्त्री भएपछि मोदीले दुईपटक नेपालको राजकीय/औपचारिक भ्रमण गरेका छन् भने सार्क र बिमस्टेकका शिखर सम्मेलनमा उनी दुईपटक नेपाल आएका छन् । मोदीले पछिल्लोपटक चार वर्षअघि २८ र २९ वैशाख ०७५ मा नेपाल भ्रमण गरेका थिए । त्यसवेला मोदीले जनकपुर, काठमाडौं र मुक्तिनाथ भ्रमण गरेका थिए । मोदीलाई काठमाडौं महानगरपालिका र जनकपुर उपमहानगरपालिकाले नागरिक अभिनन्दन गरेका थिए । मोदीलाई यसपटक लुम्बिनी सांस्कृतिक नगरपालिकाले पनि अभिनन्दन गर्नेछ । 

मोदी १४ र १५ भदौ ०७५ मा बिमस्टेकको चौथो शिखर सम्मेलनमा सहभागी हुन नेपाल आएका थिए । मोदी त्यसअघि ०७१ मा ९ देखि ११ मंसिरसम्म सार्कको १८औँ शिखर सम्मेलनमा सहभागी हुन काठमाडौं आएका थिए । मोदीले प्रधानमन्त्री भएपछि पहिलोपटक ०७१ साउन १८ र १९ मा नेपाल भ्रमण गरेका थिए । त्यसवेला उनले संविधानसभालाई सम्बोधन गरेका थिए । 

मोदीले काठमाडौं उपत्यकाबाहिर रहेका नेपालका प्रमुख धार्मिकस्थल जनकपुर र मुक्तिनाथ भ्रमण गरिसकेका छन् । उनले जनकपुर, मुक्तिनाथ र लुम्बिनी भ्रमण गर्ने उद्घोष पहिलेकै भ्रमणमा गरिसकेका थिए । 

सार्क शिखर सम्मेलनमा सहभागी हुन आएका वेला मोदी र तत्कालीन प्रधानमन्त्री सुशील कोइरालाबीच भएको वार्तामा काठमाडौं–वाराणसी, जनकपुर–अयोध्या र लुम्बिनी–बोधगयालाई भगिनी सहरका रूपमा विकास गर्ने सहमति भएको थियो । पशुपतिनाथ र काशी विश्वनाथ मन्दिर, रामचन्द्रको जन्मस्थल अयोध्या र सीताको जन्मस्थल जनकपुरधाम तथा गौतम बुद्धको जन्मस्थल लुम्बिनी र ज्ञान प्राप्त गरेको बोधगयालाई एक–अर्कासँग जोड्नुपर्नेमा नेपाल र भारत दुवैको जोड थियो । मोदीले तत्कालीन प्रधानमन्त्री कोइरालालाई बोधगयामा रहेको महाबोधी मन्दिरबाट ल्याएको बोधीको बिरुवा लुम्बिनीको मायादेवी मन्दिर परिसरको अशोक स्तम्भछेउमा रोप्ने गरी उपहार दिएका थिए । 

मोदीलाई महाविद्यावारिधि 
भारतीय प्रधानमन्त्री मोदीलाई लुम्बिनी बौद्ध विश्वविद्यालयले मानार्थ महाविद्यावारिधिबाट सुशोभित गर्ने भएको छ । ‘विश्वविद्यालयको महासभा र कार्यकारी परिषद्ले पारित गरिसकेको छ । विश्वविद्यालयले प्रधानमन्त्री मोदीलाई विश्वविद्यालय प्रांगणमा मानार्थ महाविद्यावारिधिको उपाधिबाट सम्मान गर्ने तय भएको छ,’ विश्वविद्यालय महासभा सदस्य प्राध्यापक रमेश ढुंगेलले नयाँ पत्रिकासँग भने । 

ढुंगेलका अनुसार नेपालका विश्वविद्यालयबाट यो स्तरको सम्मान प्राप्त गर्ने मोदी पहिलो भारतीय प्रधानमन्त्री हुन् । लुम्बिनी बौद्ध विश्वविद्यालयबाट मानार्थ महाविद्यावारिधि प्राप्त गर्न लागेका प्रधानमन्त्री पहिलो विदेशी नागरिक हुन् । ‘बुद्धजयन्तीका दिन हामी प्रधानमन्त्री मोदीलाई सम्मानित गर्दै छौँ । लुम्बिनीको दर्शन सकिएपछि सम्मानको कार्यक्रम तय भएको छ,’ ढुंगेलले भने ।

News Source: Nayapatrika